طريقة تحضير البريوات باللوز

طريقة تحضير البريوات باللوز

السلام عليكم و رحمة الله و بركاته

موقع الحادكات يقدم لكم

طريقة تحضير البريوات باللوز

هاد البريوة كما لا يخفى على العديد كنت نزلتها السنة لي فاتت فدورة رمضان و هي كتجي زووووووووووووووووينة بزآآآآآاف مابقيتش نستغنى عليها من نهار كليتها عند الاخت ديالي منين قلت ليها على المقادير قالت لي راه كاينين فكتاب الطبخ المغربي ديال لطيفة بناني سميرس
مانطولش عليكم راها كتجي لذيدة بزآآآآآآآآآآاف
على بركة الله سنحتاج ل

مقادير البريوات باللوز

500 غ لوز

1 م ص قرفة

350 غ سكر كلاصي (انا كندير فقط 200 غ)

4 دالبيضات مطربين

ورقة البسطيلة
زيت لقلي اللوز
ربع م ص مسكة حرة مدقوقة
ربع كاس ماء زهر
زيت لقلي البريوة
لعسل

طريقة تحضير البريوات باللوز
كنسلقو اللوز و نقشروه و نشفوه ثم نقليوه فزيت سخونة

منين يبرد نطحنوه
نضيفو عليه السكر كلاصي و القرفة

كناخدو تقريبا كاس الا ربع دالزيت لي قلينا فيها اللوز ونديروها فطاوة على نار مهيل تغلي و نضيفو اللوز
و نخلطو حتى يتجمع لينا اللوز
نضيفو البيض على مراحل و كل مرة نضيفو البيض نخلطو بسرعة باش مايطيبش البيض

كنضيف ما زهر

و نستمر فالتخلاط و دائما على نار مهيلة

حتى تجمع لينا الخليط

كنطفي لبوطا و عاد كنضيف المسكة الحرة باش ماتقسحش لي البريوا
منين بردات عملتها كويرات

كناخد الورقة كندهنها بشوية دالزيت و الجناب كندهنهم بالبيض

ثم كنبدا نطوي البريوا بالشكل المعتاد غير نتبهو مع الجناب ائما نسدوهم مزيان باش ماتخرجش لينا العقدة منين نكونو كنقليوها

الطرف لي كيبقى كندهنو بالبيض و كندخلو لداخل لبريوا

درت الزيت تسخن مزيان و رميت فيها لبريوا
و فنفس الوقت درت العسل كيسخن و نقصت عليه البوطا
منين خداو اللون الدهبي زولتهم من الزيت و رميتهم فالعسل
ثم من بعد عملتهم يتصفاو

ها هما منين وجدو زوقتهم بلزنجلان و الباقي عملتو فطاسة بلاستيك و سديتها مزيان و عملتها فالكونجيلاتور